dots-menu
×

Home  »  The Oxford Book of Latin Verse  »  Augustus returns in triumph

Heathcote William Garrod, comp. (1878–1960). The Oxford Book of Latin Verse. 1912.

Horace 65 B.C.–8 B.C.

Augustus returns in triumph

HERCVLIS ritu modo dictus, o plebs,

morte uenalem petiisse laurum

Caesar Hispana repetit penatis

uictor ab ora.

unico gaudens mulier marito

prodeat iustis operata sacris

et soror clari ducis et decorae

supplice uitta

uirginum matres iuuenumque nuper

sospitum; uos, o pueri et puellae

iam uirum expertae, male inominatis

parcite uerbis.

hic dies uere mihi festus atras

eximet curas: ego nec tumultum

nec mori per uim metuam tenente

Caesare terras.

i, pete unguentum, puer, et coronas

et cadum Marsi memorem duelli,

Spartacum siqua potuit uagantem

fallere testa.

dic et argutae properet Neaerae

murreum nodo cohibere crinem;

si per inuisum mora ianitorem

fiet, abito.

lenit albescens animos capillus

litium et rixae cupidos proteruae;

non ego hoc ferrem calidus iuuenta

consule Planco.