dots-menu
×

Home  »  The Oxford Book of Latin Verse  »  The Ass in the Lion’s Skin

Heathcote William Garrod, comp. (1878–1960). The Oxford Book of Latin Verse. 1912.

Avianus circa 400 A.D. (?)

The Ass in the Lion’s Skin

METIRI se quemque decet propriisque iuuari

laudibus, alterius nec bona ferre sibi,

ne detracta grauem faciant miracula risum,

coeperit in solitis cum remanere modis.

exuuias asinus defuncti forte leonis

repperit et spoliis induit ora nouis.

aptauitque suis incongrua tegmina membris

et miserum tanto pressit honore caput.

ast ubi terribilis mimo circumstetit horror

pigraque praesumptus uenit in ossa uigor,

mitibus ille feris communia pabula calcans

turbabat pauidas per sua rura boues.

rusticus hunc magna postquam deprendit ab aure,

correptum stimulis uerberibusque domat;

et simul abstracto denudans corpora tergo

increpat his miserum uocibus ille pecus;

‘forsitan ignotos imitato murmure fallas;

at mihi, qui quondam, semper asellus eris.’